Кажи ни нешто повеќе за почетоците на WICЕ. Како дојде до идејата и што всушност претставува WICE?

Софија Дацева:
Матриошка е компанијата што стои позади брендот WICE и започна како мала идеја која излезе од мојата љубов за иновации и технологија. Водена од желбата да внесам нешто ново на македонскиот и странскиот пазар, решив да се фокусирам на производи што можат да го комбинираат најдоброто од двата света – традицијата и современите иновации. Во 2017 година ја основав компанијата кога веќе имав развиено‘proof of concept’. Имено, нашата уникатна предност е фактот што ние имаме развиено технологија која го енкапсулира виното во основната смеса на сладоледот, каде крајниот резултат претставува сладолед кој е направен со 50% вино и може да содржи до 8% алкохол во него, а при тоа има рок на траење од 12 месеци, правејки го производот идеален за масовна потрошувачка.

Во 2019 година сладоледот веќе беше во понапредна фаза и единственото нешто што ни остануваше во тој момент е да се развијат и самите вкусови. Земете во предвид дека не секое вино има свој специфичен вкус, па така, еквивалентно важно е и да се развие соодветен вкус на сладолед, кој всушност би бил комплиментарен и би ги изразувал нотите на самото вино. Во овој момент кога ги развивавме вкусовите и дојдоа Х Фактор Акцелератор, каде заедно со нивната подршка започнавме да ја градиме фабриката почнувајки од 2020 година, која денес е целосно автоматизирана.

Во однос на вкусовите, првите два што ги развивме се: Мерло‑чоколадо‑вишна и Ризлинг‑ванила‑малина, двата направени со 50% македонско вино и 4.5% алкохол.

Во моментов WICE има палета од 10 видови на сладолед од кои 4 се вински, а останатите 6 се регуларни вкусови.